Banda ere frontoian arituko da, domekan, 12:30ean, Santa Zezilia ospatzeko. Eguraldiak laguntzen badu, aurretik kalejira egingo dute: "Askotariko estiloak egongo dira: klasikoa, euskal musika, modernoa... Gustu guztientzat, eta gauza berriak ezagutzeko aukerarekin".
Iaz ere ezin izan zuten kalejirarik egin Bergarako Musika Eskolako txikienek, baina, dena ondo bidean, azaroaren 25ean beteko dituzte herriko kaleak musikaz, Banda Gazteko kideek lagunduta. 17:30ean hasiko dira, plazan, eta eguraldiaren araberakoa izango da ibilbidea. Hala ere, bukaeran kontzertu txiki bat emango dute. Musika Eskolako zuzendari Marije Ugaldek azaldu duenez, iaz lehenengoz egindako hainbat ekintza ere berreskuratuko dituzte: "COVID-19a zela-eta, Santa Zezilia egunaren bueltan egiten ditugun ohiko ekintzak moldatu egin genituen. Eskolan bertan antolatu genuen egitaraua, eta aste osoan zehar egin genituen ekintzak. Photocall-a eta pegatinak ere egin genituen orduan, eta aurten kalera aterako ditugu, denen eskura".
