'Hauts’ dokumentalak amiantoaren biktimen eta haien senideen sufrimendua azaleratzea du helburu. Horretarako Celestino Tolosaren istorioa hartzen du abiapuntu: CAF enpresako langile ohia izandakoak asbestosiaren ondorioz birika transplante batean bizia galdu zuen. "Urtean batez beste 88.000 heriotza eragiten ditu Europar Batasunean, eta milaka langileri eragiten dien arazoa da, gaur egun gaixotzen jarraitzen baitute 2000. urtearen aurretik izan zuten kontaktuagatik".
Dokumentalaren egileen arabera, arreta berezia jarri nahi izan dute "erakundeen interesetan": "Arazoaren garrantzia ezkutatu dute, horrela, amiantoak eragindako milaka hildako agerian ez geratzeko, isilean, merezitako aitorpenik gabe".
Zazpi testigantza
Guztira, zazpi pertsonen testigantzak batzen ditu dokumentalak: Otsanda Tolosa (kaltetu baten alaba), Jesus Uzkudun (Asviamieko kidea eta kaltetua), Nuria Bustos (Celestino Tolosaren kasuaren abokatua), Santiago Izquierdo (kaltetua), Felix Casado (kaltetua), Jon Garcia (CAFeko langile ohia eta Asviamieko kidea) eta Emiliano Briceño (pneumologoa).
Dokumentala Ekhiotz Mancisidorrek (zuzendaria), Omar Granak (ekoizpen arduraduna) eta Iñaki Fernandezek (dokumentalaren edukia eta narratibaren arduraduna) egin dute, Gipuzkoako Foru Aldundiak 'Piztu meta! 2021' deialdiaren bidez finantzatutako crowdfunding kanpainarekin.
