Bergarako Udal Gobernuak 2022rako aurrekontu proposamena osatu du. 27.212.333€-ko proposamena bidali die oposizioko alderdiei, 2021ekoa baino %7,7 handiagoa, eta azaroaren 24a bitarte izango dute azken hauek ekarpenak egiteko tartea. Udal Gobernuak prentsa oharrean jasotako hitzetan, "aurreikuspena da abenduan onartzea".
"Une honetan beharrezkoa da ohikotasunera urratsak ematea, eta lehentasunezko arloak aintzat hartuta, proiektu berriak eta berritzaileak sortzea, eraikitzaileak izatea", adierazi du Udal Gobernuak. Bide horretan, "adin eta behar desberdinak dituzten herritarrei erantzuteko asmoz landu dira hainbat proiektu"; besteak beste, eguneko zentro arinaren proiektuarekin jarraitzea, pertsona nagusien mahaia osatzea edo aniztasun funtzionala duten gazteentzat aisialdi eskaintza egokitzea. Gizarte Zerbitzuetara bi milioi eta erdi eurotik gora bideratzea proposatzen da, iaz baino %6,3 gehiago.
Ekonomia, turismoa, berritzeak eta herritarrak
Beste hainbat proiektu eta proposamenen artean, lau alor azpimarratu nahi izan ditu Udal Gobernuak helarazitako oharrak. "Ehun ekonomiko indartsua" egoteko, sustapen ekonomikora 2021ean baino %15 gehiago bideratzea proposatu du Udalak (693.251€, orotara); "datozen egunetan" aurkeztuko den plana oinarri, turismoan "urrats kualitatiboa" emateko aurrekontua %18an handitzea proposatzen da; Zubieta eta Masterreka kaleen berritzeei 1.025.000€ eskainiko zaizkie; eta, azkenik, herritarrek proposatutako ur-jolasetarako ur-txorrotak egiteari 300.000€ bideratzea proposatu da.
Bergarako Udalaren webgunean daude ikusgai aurrekontu proposamenaren oinarri nagusiak.
