2020ko otsailaren 21ean Beldurra nik? kontzertua eskaini zutenetik, bergararrek ezin izan dute herriko Orkestra Sinfonikoaz aurrez aurre gozatu. "Saiatu gara jo izan ezin dugun kontzertu bakoitza nolabait ordezkatzen, sareratu ditugun bideoen bitartez ez bada ere", adierazi dio Goienari Enrike Txurruka zuzendariak. 631 egun geroago izango dute barruko harra ateratzeko aukera.
Santa Zezilia kontzertuarekin itzuliko da orkestra jendaurrera. Azaroaren 13an, zapatua, Udal Pilotalekuan eskainiko dute emanaldia, arratsaldeko 20:30etik aurrera. Txurrukaren hitzetan, eta protokolo eta segurtasun distantziak tarteko, "oraindik entseatzeko baldintzak ez dira onenak, distantziekin oso zaila baita elkar behar bezala entzutea". Ondorioz, kontzertura "prestaketa onenarekin" heltzen ez direla onartu du zuzendariak. Hala ere, ilusioz begiratzen dio hasiera berri honi: "Behintzat, hasi gara martxan! Eta hori da garrantzitsuena".
Klasikotik gaur egunera
Txurrukaren gidaritzapean, bost obra eskainiko dituzte musikariek, "beti bezala" musika estilo eta garai ezberdinak uztartuz. Berritasun gisa, itzulera ospatzeko bereziki konposatutako obra bat entzuteko aukera ere izango dute pilotalekura hurbiltzen diren herritarrek. Hona, zehazki, zapatuko egitaraua:
- Rosamunde (1823) - Franz Schubert
- Andante Cantabile (1871) - Pyotr Ilyich Tchaikovsky
- Oblivion (1984) - Astor Piazzola (Bakarlaria: Jesus M. Arriaran)
- Errefuxiatuena (2017) - Izaro Andres (Bakarlaria: Eider Elorza)
- Elkartze Doinua (2020) - Enrike Txurruka
Aholkuak
Azkenik, "kontzertuaz hobeto gozatzeko" hainbat aholku eman nahi izan dizkie aurrez Bergarako Orkestra Sinfonikoak herritarrei; besteak beste, telefono mugikorrak itzaltzea, sarrera irteeretarako obren arteko etenak aprobetxatzea edota piezek iraun bitartean isiltasun osoan egotea.
