Bergarako EAJk gogora ekarri du zein izango den aurtengo memoria egunaren helburu nagusia: "Bakearen alde egin zuten pertsona, elkarte eta mugimenduei eskerrak ematea da helburua. Egoera txarrenetan ere, bizikidetza demokratikoa eta giza eskubideen eta bakearen defentsan oinarritutako gizartea eraikitzen eta defendatzen ahalegindu diren pertsonen konpromiso zibikoa nabarmendu nahi da aurtengoan".
Iraganera begiratzearen garrantziaz dihardu EAJk, etorkizunera begira jartzeko: "Iraganera begiratu beharra dugu, iragana baita gure orainaldiaren zatia, eta gure etorkizunerako ikaskuntza izatea nahi dugu. Horregatik, iraganean bizikidetza demokratikoa eta giza eskubideen alde egin zuten horiei eskerrak emateko aprobetxatu nahi dugu guk ere".
Bergarara begirako lanketaz
Bergarara etorrita EAJk bizikidetzaren alde egiten duen lana azpimarratu dute: "Gure herria bizikidetzan oinarritutako herria izateko lanean dihardugu, ikuspegi etiko baten alde lan egiten jarraitzen dugu; giza duintasunean, errespetuan, giza eskubideen defentsan eta indarkeria guztien deslegitimizazioan oinarritutako Bergara baten alde; izan ere, ezein kausa politiko, ezein estatu-arrazoi ez baitago pertsonen duintasunaren gainetik".
EH Bilduri mezu bat ere helarazi nahi izan diote jeltzaleek: "Eskatu nahi diegu gure herrian azaltzen diren mezu iraingarriak ezabatzeko eta gaitzesteko konpromisoa har dezala. Demokrazian, bizikidetza eta normaltasun politikoa lortzeko bidean ez dira onargarriak. Mota honetako jokabideek ez dute lekurik gaur egungo gizartean eta bidea oztopatu besterik ez dute egiten. Horregatik, bizikidetzaren bidean konpromisoak har ditzan eskatzen diogu EH Bilduren Udal Gobernuari".
