Zerbitzuen sektorean kontsumoa sustatzeko, diruz lagundutako bonuak aterako ditu Bergarako Udalak herritarrentzako. Azaldutakoaren arabera, “udalerriko hiri-ekonomia suspertzea” eta “tokiko establezimenduetan kontsumo kontzientea bultzatzea” dira helburuak.
Guztira, 30.0000 euro bideratuko dira kanpainara, eta establezimenduak hiru baldintza bete beharko dituzte bonuen sisteman parte hartzeko: hamabost langile baino gutxiago izatea; ekonomia Jardueren gaineko Zergan alta emanda egotea Bergaran –eta zerga hori ordaintzetik salbuetsita egotea–, eta epigrafe hauetakoren batean alta emanda egotea: 65, 67, 86 edo 97; eta jarduera ekonomikoa jendearentzat irekitako lokal batean garatzea, Bergarako udal-mugartearen barruan.
Bonuen funtzionamendua
Pertsona bakoitzak 75 euroko muga izango du, eta establezimendu bakoitzak jaulki ditzakeen bonuen gehieneko muga 7.500 eurokoa izango da. Bestetik, 2021eko abenduaren 31 baino lehen erosi eta kontsumitu ahal izango dira –betiere udalak kanpaina honetara bideratutako kopurua lehenago agortzen ez bada–. Eta bukatzeko, bonuak kanpainara atxikitako establezimenduetan bertan erosi ahal izango dira bakarrik.
