Bederatzigarren urtez jarraian antolatu dute erreka garbiketa, eta parte hartzaileek aitortu dutenez, "beste urte batzuetan bezain zikin ez zegoen arren, oraindik ere lan handia dago egiteko". Gaur egindako garbiketan denetik aurkitu dutela ere azaldu dute: bizikleta bat, plastikoak, patinete asko, komun bat...
Epeletik Osintxurainoko erreka tartea garbitu dute, Bergarako Erreka Garbiketa Batzordeak egindako deialdiari jarraituz. Ekimenak Bergarako Udalaren laguntza izan du eta 09:30ean elkartu dira taldeak hiru gunetan: Labegaraieta kiroldegian, Osintxun eta Seminarioko patioan. Amaieran Seminarixora eraman dute batutako zabor guztia.
Kontzientziazio mezua
Parte hartzaile eta antolatzaileek azaldu dutenez, erreka garbiketarako eguna sentsibilizaziorako egun bat ere bada: "Gure seme alabak ohitu dira erreka garbiketa honetan parte hartzera eta konturatu gara erreka beste modu batean ikusten dutela; lehen gauza zikin moduan ikusten genuen erreka, eta orain berriz bizitza handia berreskuratu du. Zaborrik ez bota eta zaintzea tokatzen zaigu".
