Zertarako sortuko ditugu kultura plaza berriak? izenburupean, Bergarako Kultura Mahaiak, Bergarako Udalaren laguntzarekin, hitzaldia antolatu du datorren ostegunerako, urriaren 7rako. Arratsaldeko 18:30ean emango zaio hasiera solasaldiari, eta sarrera mugatua izango da Seminarixoko aforoa bete arte.
Hiru hizlari, hiru esperientzia
Euskal Herriko kultur espazio desberdinetako errealitateak bizi dituzten hiru hizlari eseriko dira Seminarixoan: Mikel Etxaburu Osa, Ihintza Orbegozo Igartua eta Gotzon Barandiaran Arteaga. Lehena Bilboko Alde Zaharrean dagoen Xake Espazioa eremu autogestionatuaz ariko da; bigarrena Plateruenako azken urteetako kulturgintzako arduraduna izan da, eta egun Plateruena ta gero zer? dinamikako kidea da; hirugarrena, berriz, euskarazko kulturgintzako kide aktibo bat da, beste hainbat elkarte eta dinamiken artean, Bihotz bakartien klubeko zein Ahotseneako sortzailea.
