Sorkuntzak eta esperimentazioak "garrantzia handia" daukate ikastaroan, eta bertan hainbat teknika erakutsi eta ariketa proposatuko dira: collage, argazkigintza, margolaritza, marrazketa, eskultura,...Norberak bere interesak zeintzuk diren ezagutzea dute helburu saioek ere: "Ikasle batzuk gehiago mugatzen dira proposatutako ariketetara eta beste batzuk gehiago aldentzen dira, hori bakoitzaren arabera".
Ikastaroan parte hartzeko, ez da beharrezkoa aurretik esperientzia izatea: "Uste dugunaren kontra, sorkuntzan aritzeko ez da gaitasun berezirik behar, gainontzeko jarduerak bezala egin ahala ikasten den zerbait da eta lan ezberdinak ikusiz elikatzen dugu gure iruditeria". Taldean lan giro polita sortzea, ikasleen artean jakintza elkarbanatzea eta ideiak trukatzea helburu dutela zehaztu du Santamariak.
