Kale-zurruta ohikoa bilakatu dela azaldu du Alberto Alonso talde sozialistaren bozeramaileak, eta hori "onartezina" dela iritzi du: "Kalean edatea gizalegearen kontrakotzat hartzen da. Are gehiago, pandemia existitu aurretik ere debekatuta zegoen". Gauzak horrela, jarduera hori "moztu" egin behar dela adierazi du, eta udal gobernuari kontrola eskatu dio.
Bestetik, herritarrei erantzukizunez jokatzea eskatu die: "Bergarako bizilagun gehienek osasun neurriak betetzen dituzte, baina batzuek pandemia gainditu dugula uste dute. Tamalez, ez da horrela". Bukatzeko, elkarlanean ekiteko deia egin du, krisi ekonomiko eta sozialari batera "aurre egiteko".
Udal gobernua, "lanean"
Udal Gobernuak aditzera eman du oraingoz ez duela publikoki ezer esango PSE-EEren salaketaren aurrean. Uste dute ez dela "prentsa oharren bidez landu beharreko gaia" , eta diote gaia "aspalditik" dutela mahai gainean eta "lanean" ari direla. Adierazi dute "arazoak dituen erpin ezberdinen aurrean proposamen bateratu bat" dutenean emango dutela proposamen horren berri.
