Bergarako Musika eskolak helduen taldea jarri du martxan. Xabi Torres tronpa irakaslea izango da taldeko irakaslea eta zuzendaria. "Proiektuan parte hartu gura duenak aukera du izena emateko. Ez dugu baldintzarik jartzen. Musikaz gozatzeko modua da, edonor etor daiteke. Partiturak moldatzen ditugu dauden instrumentuetara eta musikarien mailara", azaldu du Xabi Torres irakasleak.
Astean behin elkartuko dira
Talde heterogeneoa dela nabarmendu du eta edozein instrumentu mota onartzen dutela. Gaur gaurkoz sei lagunek eman dute izena taldean: biolina, txeloa, gitarra, perkusioa... "Astean behin elkartzen gara eta ez dugu helburu jakinik. Entseatu egingo dugu eta gu prest gaudenean hasiko gara dakiguna erakusten", dio. "Garrantzitsuena da talde baten parte sentitzea, ondo pasatzea eta zerbait ikasteko aukera baldin badago hobeto", gaineratu du Torresek.
Santurtziko taldea
Bergara Musika eskolan bakarrik ez, Santurtziko Musika eskolan ere irakaslea da Torres. "Orain dela 8 urte sortu genuen helduen taldea. Asteroko saioak egiten ditugu, giro ona dugu, musika ikasten dugu...", azaldu du.
Gaur, Mariaren Lagundiako elizan eskaini duten emanaldian euskal abestiak jo dituzte: Benito Lertxundiren Gure bide galduak, Fernando Goenagak moldatutako Isil-isilik dago, kubatar ukitua ipini dute Guantanamera abestiarekin eta Fernando Velazquezen Etorkizuna.