Xaxau birusa bueltan da, COVIDak ahuldu badu ere

Julen Iriondo M. de Zuazo 2021ko ira. 10a, 15:18
Egitarauko azken saioa eskainiko duten Ibil Bedi taldeko kideak.

Xaxau konpartsak egin du publiko irailaren 15etik 18rako prestatu duen egitaraua; San Martin plazan gune bat egokituko dute –txosna eta terrazarekin–, bereziki kultura emanaldietarako, pandemiak eskatzen dituen neurri guztiak betez.

Hauxe da Xaxaukoek prestatu duten kartela.

Xaxau bueltan dator, beraz, eta mezu argi batekin dator: "Ahal dugun neurrian eta pandemiara egokituta, baina bueltan dator Xaxau. Ez da nahiko genukeen itzulera, baina... Lanean egon gara orain arte ere, baina COVID-19ak ez digu utzi nahiko genukeen moduan lan egiten. Ikusten ari gara herria poliki-poliki egoera zail honetatik irteten ari dela eta aukera ikusi dugu horren beharrezko zaigun aisialdirako es-kaintza bat lotzeko".

Udalarekin hitzarmena

Ekintza hauek aurrera eraman ahal izateko, hitzarmena sinatu dute Udalak eta Xaxauk, eta, honen bidez, 18.505,50 euroko dirulaguntza eman dio Udalak konpartsari.

"Arduraz jokatzeko unea da. Aitzitik, azken hilabeteotan ikusi ahal izan denez, osasunerako prebentzio neurriak hartuta kultura ekimenak seguruak dira. Ez hori bakarrik, herritarren eta, hortaz, herriaren gogo-osasuna eta bizipoza indartzeko bitarteko egokiak dira. Pixkanaka ohiko jarduerak berreskuratzeko urratsak emango ditu Udalak, osasun egoerak ahalbidetzen duen neurrian, eta osasungintzan adituek ematen dituzten gomendioei jarraituz", adierazi du Udalak hitzarmenaren berri emateko bidalitako oharrean.

"Bergarako Udalak ekimenak gauza daitezen bitartekoak jarriko ditu. Plaza hesitu egingo da eta terrazarako eremua markatuta egongo da. Halaber, edukiera mugatuta egongo da. COVID-19aren hedapena saihesteko kontingentzia planean jasotako neurriak ezarriko dira, esaterako: gel hidroalkoholikoa egongo da sarreran, jendearen arteko distantzia zainduko da, maskara erabili beharko da, erabilera bakoitzaren ondoren mahaiak desinfektatuko dira… Horiek beteko direla bermatuko du Xaxauk". 

Aisialdia eta kultura gozatzera gonbidatu ditu Udalak herritarrak: "Aldi berean, elkarbizitza sustatzeko, elkar zaintzeko eta ingurunea errespetatzeko –zaborrak jasoz, adibidez– eskatu nahi die". 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak