Azkenekoz uztailean izan ziren Miniaren barruan, Alcañizko zirkuituan: "Ez ginen nahi moduko azkarrak izan. Nire taldekideak erabaki zuen zirkuitua ez genuenez ezagutzen ez zuela merezi gurpil berrietan dirua gastatzen ibiltzea, eta gurpil zaharrekin lehiatu ginen. Eta, noski, sekulako aldea dago. Entrenamenduetan bederatzigarren sailkatzeko gauza izan nintzen, eta pozik geratu nintzen lasterketarekin, hiru postu aurreratu nituelako –6. postua–. Gero, taldekideak, Rafak, hartu zuen erreleboa eta ez zuen erritmoa aurkitu proban, 16. postuan amaitu genuen. Bigarren lasterketan, berriz, 20. postuan hartu nuen autoa eta ez nintzen oso animatuta hasi. Baina lasterketa 11. amaitu nuen".
Jaramako lasterketarako, berriz, aurrean ibiltzeko esperantza dauka: "Gurpilak estreinatuko ditugu eta entrenamendu saioetan bost onenen artean egon nahiko nuke". Eta Cooper Kopa amaitzeko azken hitzordua geratuko zaie, Jerezen, urri hasieran: "Harako ere oso gogotsu nago, zirkuitu azkarra da eta ondo ezagutzen dut hura ere".