Hilaren 10etik 26ra bitartean, Erraldoiak eta Bergara; jaia, musika, herria izeneko erakusketa egongo da ikusgai Bergarako Aroztegi aretoan. Konpartsakideen esanetan, erraldoiek Bergarako jaietan izan duten presentzia, erraldoi taldeak izan duen ibilbidea eta bestelako bitxikeria batzuk ikusi ahal izango dira.
Bestetik, hitzaldi bat ere egongo da, erraldoien jatorrian eta ohituretan sakontzeko. Hiru adituk jardungo dute Seminarixoan, hilaren 12an, 12:00etan. Zergatik dantzatzen dute erraldoiek? Zer dantzatu dezakete? Noiztik dantzatzen dute? Horiek eta beste hainbat galdera argituko dituzte Iñigo Castellano Tuterako erraldoi konpartsako arduradunak, Patxi Laborda 25 urtez Iruñeako konpartsako kidea eta egun Sestaoko konpartsako arduraduna denak eta Mari Ganuza erraldoi egileak eta 20 urtez Iruñeako konpartsako arduraduna izan denak.
