802.834 euro bideratuko dira Bergarako etxeko laguntza-zerbitzura

Uxue Igarza Loiola 2021ko abu. 31a, 15:40

Iaz 121 pertsonari eskaini zitzaien laguntza-zerbitzua; horietatik %82k ezgaitasun egoera onartua zuen eta batez besteko adina 82 eta 83 urte artekoa izan zen. Aurten, zerbitzu horretara ia 130.000 euro gehiago bideratzea aurreikusten da.

Bergarako Udalak lehiaketa publikora atera du etxeko laguntza zerbitzuaren deialdia eta Eulen Servicios Sociosanitarios, S.L enpresarekin sinatu du hitzarmena. Bihar, irailak 1, sartuko da indarrean.

Prebentzio-izaerako zerbitzuak mendekotasun-egoeran –edo mendekotasun-arriskuan– dauden pertsonei laguntzea du xede. Horretarako, onuradunak etxeko lanak egiten dituen langile baten laguntza jasotzen du bizilekuan.

Beharren araberako laguntzak eskaintzen dira (etxeko lanetarako laguntza, laguntza pertsonala, beste jarduera osagarri edo berezi batzuk egiteko laguntza…), astelehenetik igandera eta egunean gehienez 4 orduz. Aurten 30.200 ordutako zerbitzua eskaintzea aurreikusten du Udalak, eta horren kostua 802.834 eurotakoa izango da.

Iaz baino 3.000 ordu gehiago

Iazko urtean 27.859 laguntza ordu eskaini ziren (aurten espero direnak baino 3.000 gutxiago) . Horien %37,81 laguntza pertsonalera bideratu ziren, %57,71 etxeko lanetara eta %5,06 beste ekintza batzuetara. Halaber, orduen %89 ezintasun egoeran zeuden pertsonei eskaini zitzaien.

Guztira 95 etxebizitzatan eskaini zen zerbitzua –121 pertsonari– eta 673.077,20 euro bideratu ziren. Bergarako Udalak kostuaren %47 ordaindu zuen, Aldundiak %27 eta zerbitzu jasotzaileek %26.

 

 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak