Joan den astean herritarren aurrean aurkezpena egin ostean, Angiozar Tokiko Entitate Txiki izateari buruzko partaidetza prozesua abiatu dute SIADECO Ikerketa Kooperatibarekin.
Prozesua hasteko, herritarrekin elkarrizketak dabiltza egiten, baina bestelako dinamikak ere egingo dituzte. Hala, era anonimoan betetzeko inkesta bat ari dira prestatzen, eta Angiozarko eragile nagusiekin elkarrizketa fokalak ere egingo dituzte. Arbiaska Guraso Elkartea, Angiozar Jorratzen Garapen Elkartea, San Migel Parrokia, Eskola, Elkarte Gastronomikoa eta sei auzoetako ordezkari izango dira elkarrizketa fokal horietan parte hartuko dutenak. Horietan guztietan jasotakoak batzar irekiekin osatuko dituzte.
Uztailean amaituko da partaidetza prozesua, eta aldi berean, Bergarako Udalak bailarako ondasun eta zerbitzuen azterketa bat egingo du. Behin biak bukatutakoan, elkartu eta proposamen juridiko-tekniko-ekonomiko bat garatuko dute Bergarako Udalarekin eta Angiozarrekin balizko deszentralizazio aukerak jorratzeko.