Garaipen borobilarekin bukatu du denboraldia Bergarak, etxean. 4-0eko markagailua jarri dute Agorrosinen Barkeroren mutilek, eta jokoan zegoen Ohorezko Erregional Mailako 7. postua erdietsi dute.
Norgehiagoka jokaldi garrantzitsu batek baldintzatu erabat. Bergarak baloia sareetara bidaltzeko aukera argia izan du, eta Elgoibarko jokalari batek eskuarekin aldendu du baloia bere taldea 10 jokalarirekin utziz. Hamaika metroetatik ez dute hutsik egin mahoneroek, eta txartel gorriaren ostean maldan behera jarri zaie neurketa.
UDA, bosgarren
Maila bereko 5. postuagatik lehian ibili da Aretxabaletako taldea Zarautzen, eta UDAk 0-2ko garaipena eskuratu du etxetik kanpora. Denboraldia, beraz, Ohorezko Erregional Mailako bosgarren moduan bukatu dute aretxabaletarrek.
