San Martzialera igotzen dena jaitsi egin behar dela gogorarazi nahi izan die Udal Gobernuak herritarrei: "Ahaztu egin zaizue San Martzialen utzitakoak jasotzea? Joaneko bidaia baino arinagoa buelta, ezta? Zuekin eraman hurrengoan, ondoren joaten garenok ez ditugu hauek bertan topatu nahi. Eskerrik asko!".
Horrekin batera, espazio publikoak zaintzea "guztion" ardura dela diote: "Espazio publikoak guztiok erabiltzeko dira, eta denoi dagokigu hauek zaintzea. Garbi egotea gustatzen zaigu bertan disfrutatu ahal izateko, ondoren joango direnei errespetuz, garbi mantentzea dagokigu. Zentzuzkoa da hori, beti izan da horrela. Baina, ez hori bakarrik, garbiketan bitarteko gehiago inbertitu behar izateak, gastuaz gain. Eta diru publikoaz ari gara; beraz, hori zaintzea dagokigu, badakar langile horiek beste lan batzuk ezin egitea".
Udal Gobernuak "lan pedagogikoa" egin nahi duela ere gaineratu du: "Heziketa eta hezkidetza kontu bat da hau. Kontzientziazioan eragin behar da. Edozein motatako edozein gune publikoko erabiltzailek, edozein espazio erabiltzen duela, jakin behar du, beti izan den moduan, zentzuz jokatzen, elkarbizitza errespetatzen. Udal Gobernuaren ustez, jokaera hauek oso desegokiak dira eta horiek heziketa bitartez bideratu behar dira, edukazio kontua bada, elkarbizitza kontua. Bestelako neurri batzuk hartzea ez da hauek baino eraginkorragoa izango".
