Bere jaioterrian banatzen den Igarza saria irabazteak eman zion aukera liburu bat idazteko eta kaleratzeko, eta segituan aukeratu zuen gaia eta pertsonaia: 19 urte zituenean ETAk aita hil zion Oihana. "Oso barneratua izan dut urteetan minarekin eta sufrimenduarekin konexio hori, eta barneratutako guztiak kaleratzeko ariketa ederra bezain aberasgarria izan da liburua idaztea", esan du egileak.
Duela bi hilabete kaleratu zen liburua, eta dagoeneko hasi da irakurleen aldetik iritziak jasotzen. "Ederra iruditzen zait edozein liburuk eragin dezakeen sentimendu, bizipen, zirrara... horiek, irakurleak egilearekin partekatzea. Eta hori gertatu zait. Asko dira nigana hurbiltzeko gogoa izan dutenak, liburuak sorrarazi dien hori kontatzeko. Gakoa da, irakurlea bera, liburuko pertsonaia sentiaraztea. Eta, antza, lortu dut".