Eskuz banako txapelketako finalerako geltoki bat baino ez zaio geratzen Beñat Rezustari. Txapelketa hasieran inor gutxik aurreikusiko zukeen Rezustak halako bidea egin zezakeenik, besteak beste, Eskuz Binakakoan ez zuelako Olaizolarekin batera bere bertsiorik onena erakutsi, eta, bestela ere, Eskuz Banakakoa, historikoki, aurrelarien txapelketa izan delako; Patxi Ruiz izan zen torneoa irabazi zuen azken atzelaria, duela ia 20 urte.
Edozelan ere, bergararra bertsiorik onena erakusten dabil; lehenengo kanporaketan, Oinatz Bengoetxeari irabazi zion (22- 14), eta joan den astean, errezeta berbera erabilita Elezkano kanporatu zuen (8-22); hala, Rezusta txapelketako ezuste positiboetako bat bilakatu da dagoeneko.
Artola ere, maila oso onean
Bihar, zapatua (17:15, Labrit), Rezustak maila oso onean diharduen Artola izango du aurrean. Alegiako pilotariak Urruti kanporatu zuen lehen partiduan (22-7), eta Agirre ere etxera bidali zuen bigarrenean (22-18).