Beñat Rezustak buruz buruko finalerdiak jokatuko ditu bigarrenez, azkenekoz hori egin eta lau urte geroago. Bergarako atzelariak nagusitasun osoz irabazi zion atzo Danel Elezkanori, Idiazabalen, final-laurdenetako lehen partidan: 22-8. Rezustak Mikel Urrutikoetxea edo Iñaki Artola izango du aurkari finalerdietan. Baikoko bi pilotariak bihar ariko dira, Bilbon.
Eskuinarekin ere sendo
Erakustaldia eman zuen atzo Rezustak, eta ez zion aukerarik eman Elezkano II.ari. Pilotakada indartsuak emanez, uneoro hartu zuen mendean Rezustak Elezkano, eta pilotakada luzeak, aurrean egindako jokaldiekin tartekatu zituen, aurkariari zalantzak sortze aldera. Nabarmentzekoa izan zen, gainera, pilotari bergararra ezkertiarra bada ere, eskuinarekin ere, sendo aritu zela.
Gaur, beste finalerdia geratuko da zehaztuta. Final-laurdenetako bi lehia jokatuko dituzte Donostian (17:30, ETB1): Jose Javier Zabaleta, Dario Gomezen aurka; eta, Joseba Ezkurdia, Jokin Altunaren kontra. Irabazleak elkarren aurka ariko dira.