Etenaldi luze baten ostean atzo, maiatzak 16, bueltatu ziren Bergarako Ariznoa taldeko gimnastak lehiatzera. Gipuzkoako txapelketa jokatu zuten atzo Tolosan eta Bergarako gimnasten gazte mailako taldea izan zen onena. Hala, Miren Legorburu, Naia Aranguren, Lierni Azkarate eta Itziar Alberdik ekainaren 20an Durangon jokatuko dute Euskadiko txapelketa.
Ariznoa taldeko arduradunen arabera, atzoko goizeko emanaldia "borobila" izan zen. Banakakoan, Itziar Alberdi uztaiarekin eta mazarekin aritu ondoren laugarren sailkatu da. Gazte mailan, Miren Legorburu, Naia Aranguren, Lierni Azkarate eta Itziar Alberdik osatutako taldeak Gipuzkoako garaile izatea lortu zuten. Arratsaldez, berriz, senior kategorian June Legorburu aritu zen pilotarekin eta xingolarekin. Pilotan hirugarren izan zen, eta xingolarekin laugarren. Sailkapen orokorrean laugarren sailkatu zen.