50 lagun baino gehiago izan ziren bileran, eta ortu komunitarioen inguruan dituzten premiak, gogoak, helburuak... azaldu zituzten. Horri esker gaiaren inguruan dagoen eskaera "errealagoaren" argazkia izatea lortu zutela uste dute Bergarako Udaletik.
Zehazki, 30 pertsona inguruk azaldu zuten lur sail bat lantzeko gogoa eta horiek ildo hori landu zuten bileran. Bigarren talde batean bildu ziren bestelako proiektuak gauzatu nahiko lituzketen pertsonak. "Ikastetxeetatik, adibidez, baratze proiektua bertan gauzatu ahal izateko aukera ere komentatu zen", azaldu dute. "Proiektua integrala izatea nahi dugu, horregatik, norbanakoen ortu soilez haragoko ekimen berri, berritzaileak gauzatu nahi dituztenek ere euren lekua topatuko dute ekimenean", diote.
Herritar eta eragileekin elkarlanean
Prozesu osoa herritarrekin eta eragileekin "batera" egin nahi du Bergarako Udal Gobernuak. Helburuak, kokapena, arautegia eta funtzionamendua, besteak beste, partaidetza prozesu baten bidez zehaztuko dituzte.
Gainera, argitu dute parte-hartzean oinarritutako prozesua denez, unean joango direla epeak eta beste zehazten: "Ezartzen diren helburuek baldintzatuko dute proiektuaren diseinua eta ondorioz, epeak". Hala ere, "orientagarria" den kronograma bat badute dagoeneko: 2021eko abenduan exekutatuko lirateke ortuak, 2022ko urtarril eta otsailean osatuko litzateke lurra landuko luketenen zerrenda eta 2022ko martxoan adostuko litzateke arautegia erabiltzaileekin.