Maiatzaren lehena aldarrikatzeko asmotan, hainbat ekintza daude deituta zapaturako Bergaran. Bi izango dira egun horretan herriko kaleak aldarriz betetzea aurreikusten duten manifestazioak. "Lan, bizitza eta pentsio duinak" aldarrikatuz, "Maiatzak 1 bateratua" egiteko deia luzatu dute herriko hainbat talde eta eragilek.
San Martin plazatik abiatuko da manifestazioa, 20:00etan. Besteak beste, honakoak dira deialdi horrekin bat egin dutenak: LAB, ESK, ELA, Martxanterak, Pensiodunak, Ernai, Ikama, Neska gazteak, Gure Artera , Xaxau konpartsa, tabernari eta ostalariak,...
Era berean, apirilaren 30erako, egubakoitza, hitzaldia deitu dute LABek eta Ernaiek, 18:00etan Kartzela Zaharrean. Tubacex borrokan! izenpean, Aiaraldeko Ernaiko Maddi Isasik eta Ixone Retesek, Tubacexeko LABeko delegatuak eskainiko dute hitzaldian.
"Klase gorrotoa antolatu"
Kontseilu Sozialista Deba Bailaratik ere, maiatzaren lehenerako manifestazioa deitu dute, 18:30etan Bergarako San Martin plazatik abiatuta. "Klase gorrotoa antolatu" lelopean egingo dute, eta maiatzaren 1ean mobilizatzeko arrazoiak ugariak direla zehaztu dute: "Egun bizi dugun testuinguruan areagotutako kontrol soziala salatu, langile klasea miseriara kondenatzen duen sistema kapitalista gaindituko duen antolakuntza aldarrikatu, edota maiatzaren lehena borroka eguna dela aldarrikatzea".
Manifestazioan parte hartu eta deialdiarekin bat egiteko mezua zabaldu nahi izan dute.