"Bergarako lurretan egitasmoa aurrera eramateko hainbat modu egon daitezke, eta horiek definitzeko partaidetza prozesu bat irekiko da. Horrela ikusiko dugu gaian interesa duten pertsonek zein behar edo nahi dituzten ortuen gaiari dagokionean. Horiek ezagutuz erantzun egokia eman ahal izango die Udalak", adierazi du Ekaitz Aranberri zinegotziak.
Hainbat gai mahai gainean
Partaidetza prozesuan hainbat gai jorratuko dira, besteak beste, ortua izan nahi duten eta lurrik ez duten herritarrentzako lur zati bat lagatzea eta lagapen honen funtzionamendua adostea, herri edota eskualde mailan egon daitezkeen ekimenak ezagutu eta hauen bideragarritasuna aztertzea, eta ikastetxeekin eta haurrekin ortuen inguruko lanketa gauzatzeko eta handitzeko aukerak aztertzea.
Egitasmo honekin Udalak hainbat helburu bete nahi ditu, besteak beste: hiri eta hirigune inguruko espazioa erabilera publikorako berreskuratzea; ortuen izaera hezitzailea eta ludikoa sustatzea; autokontsumoa bultzatzea; hiri inguruneak dinamizatu eta gizarte loturak indartzea; hirigintza parte-hartzaileagoa martxan jartzea; Bergarako biztanleriaren artean bizimodu jasangarrirako ohiturak sustatzea, hala nola, nekazaritza ekologikoa edo energiaren optimizazioa eta baserri bizimodua eta kaleko bizimoduaren arteko oreka bilatzea.