Bergarako Udalak azaldu du, gaur egunera arte, emakume eta gizonen arteko berdintasunaren bidean hainbat urrats eman dituela eta berdintasunak lege mailan izan duen garapenari erreparatuz, Bergaran diseinatu eta garatu diren Berdintasun Planak, gaur arte, bi direla. "Lehena, 2010-2013 urte bitartean garatu zen eta honen ebaluazio zein egoeraren diagnostikotik abiatuta sortu zen bigarrena, 2018 urtean. Azken Berdintasun Plan honen indarraldia agortuta, momentu honetan udalaren konpromisoa dagokion ebaluazioa martxan jarri eta Bergarako hirugarren Berdintasun Planaren diseinurako lan prozedura martxan jartzea da", adierazi du.
Elkarlanari jarraipena hirugarrenean ere
Udalaren esanetan, bigarrenaren helburu nagusia, udalean bertan eta udaletik herrira burutzen diren ekintzetan berdintasun ikuspegia txertatzea izan da. "Era berean, herriko eragile desberdinen inplikazioa ere ezinbestekoa izan da planaren diseinu zein exekuzioan zehar", gaineratu du. Zentzu horretan, "elkarlanean zein parte-hartzean" oinarritutako lan eredu horri jarraipena ematea izango da bigarrenaren ebaluaziorako zein hirugarrenaren diseinurako proposatzen den lan eredua.
Balorazioa zein plan berriaren diseinua 2021ean zehar egingo da eta prozesuak Emakunderen dirulaguntza bat jaso du.