Otsailaren 11n lan-mahai bat osatzea eskatu zuten ostalariek, gaur egun indarrean dagoen ordenantza errebisatzeko eta berria egiteko. Hala, astelehenean batzartu ziren ostalaritzako eta Udaleko ordezkariak, eta prozesuaren proposamena eta egutegia aurkeztu zituen Udalak. "Prozesuan eragile desberdinek parte hartzen dutenez, mahaia sortuko da inplikatutako eragile guztiek prozesuan parte hartzeko aukera izan dezaten: ostalari, bizilagun, elbarrituen elkarteak, hirugarren adina, udala…", azaldu du Bergarako Udalak.
Ostalariek terrazen itxituren gaia mahaigaineratu zuten eta horri lotuta ordenantza "ahalik eta lasterren" egitea nahi dutela adierazi zuten, inbertsioak egitekotan, bi urterako baino epe luzeragorako izan daitezen. Dena ondo bidean, urte bukaerarako adostuta badago, 2022an jarriko da indarrean ordenantza berria.
Bestetik, terrazak ordaintzetik salbuesteari dagokionez, Udalak maiatzean egingo du balorazioa eta aurreratu dutenez, erabakia ekainean jakinaraziko dute.