Ikasle Autodefentsa Sareak "ikasle langileon interesak defendatu eta borrokatzea" du helburu, eta asmo horri jarraituz deitu dute manifestazioa egunerako, 11:30etan. Espoloitik abiatuta ikastetxeetan bizi den egoera salatu gura dute: "Osasun bermerik eza, ikasleon etengabeko konfinamenduak, ikasketa prozesuarekin jarraitzeko baliabide eza, kontrol sozialaren areagotzea eta ikasleon aurkako jarrera autoritarioen gorakada".
2020-2021 ikasturtean hezkuntza komunitatean "ezjakintasuna eta urduritasuna" nabarmendu direla zehaztu dute: "ikastetxeetan ematen diren gehiegikeriak normalizatzea eta ikasleekiko jarrera autoritarioa indartzea. Ikasleokiko dagoen tratu orokortua krudela zein inhumanoa da". Egoera horretan, hiru aldarrikapen nagusi plazaratuko dituztela azaldu dute: "Ikasleriak ikasketa prozesua kudeatzeko autonomia izatea, ikasleria subjektu politiko gisa aitortua izatea eta kontrol sozialerako baliabide errepresibo oro bertan behera uztea".