Kartzela zaharreko zineklubak –Dynamo zinekluba– eta Angiolillo liburutegiak elkarlanean antolatuta ekintza ugari egiten ari dira martxoan zehar, Transexualitate zikloaren baitan. Asteburu honetan baina, hitzordu bikoitza izan da Kartzela Zaharrean: Mi pequeño gran samurai dokumentala egon zen ikusgai egubakoitzean eta Transitos liburuaren aurkezpena egin zuten zapatuan. Antolatzaileek adierazitakoaren arabera, zikloak "harrera ona" izan du eta interesa eragin du herritarren artean.
2018ko otsailean bere buruaz beste egin zuen Ekai Lersundi 16 urteko gaztearen istorioa ardatz duen Mi pequeño gran samurai dokumentalaren proiekzioak ikusmin handia eragin zuen bergararren artean, Kartzela Zaharra betez. Proiekzioaren ostean Aitzole Aranetak solasaldia eskaini zuen, eta azaldutakoaren arabera, Ekairen heriotzak, "tamalez", transexualitatearen baitan aurrera pausoak emateko balio izan du: "Ekairen heriotzaren ostetik EAEko transexualitate legeak ez du esaten buruko gaixotasun bat dugula, eta gauzak ondo badoaz aurten aldatuko dute legea ere".
Familia eta profesionalei laguntza
Transitos liburuaren aurkezpena era "intimoan" egin nahi izan zuten liburuaren egilea den Aingeru Mayorrek eta solasaldian lagun izan zuen Ekaitz Goikoetxeak. Mayorrek azaldutakoaren arabera, 25 familien esperientzietatik abiatuta eratu dute liburua eta egoera berean egon daitezkeen familien sostengu izan gura du. Era berean, profesionalei ere laguntza eskaini nahi die lanak: "Irakasleak izaten dira askotan etortzen direnak, beraien ikastetxeetan izaten dutelako kasuren bat edo egunerokoan dituzten zalantzak partekatzen dituzte gurekin".