Emakume langileon interesen defentsan lege burgesa borrokatu lelopean, hitzaldia eta mobilizazioa antolatu ditu Debabailarako Itaia taldeak. Bergaran egingo dituzte biak, Emakume langileon ardura izatetik, asistentzia lanen sozializaziora hitzaldia UNEDen egoitzan izango da, martxoaren 6an 12:00etan. Mobilizazioa berriz martxoaren 8an bertan egingo dute, epaitegi aurrean, 18:00etan.
"Emakume langileen eguneroko miseria" lehen lerroan jartzeko asmotan antolatu ditu Itaia taldeak jardunaldiak. "Emakume langileen miseria errealitate sozialaren ondorioa" dela iritzita, "emakume langileen zapalkuntza kapitalaren metaketara azpiratua" dagoela azaldu dute.
Egoeraren aurrean, emakume langileen interesak oinarri izango dituen proposamenak garatzea "ezinbestekoa" dela zehaztu dute: "lanean jarraitu behar dugu emakume langileon arteko elkartasuna eraikitzeko, gure bizi eta lan baldintzak hobetzeko, eta horretarako gaitasun politikoak garatu eta horiek antolakuntza komunistaren baitan txertatzeko".
