Bergaran errotuta dagoen elkartea da Aspace, Udal Gobernuaren arabera, "ibilbide historiko handia" duena. Aspaldiko harremana hitzarmen bidez formalizatu dute aurten eta hainbat konponketa lan egin ditu Udalak eraikinean. Gipuzkoan dauden bost ikastetxeetako bat da Bergarako Ibaiondo kaleakoa.
Bergaran Aspacek bi gune erabiltzen ditu: Oxirondoko eguneko zentroa eta Ibaiondoko eskola. Oxirondokoa Aspaceren jabetzakoa da eta Ibaiondokoa 1979. urtetik erabiltzen du Aspacek Udalak lagata. 2009an obra egin zen gaur egun duen erabilerara bideratzeko. 2021ean lagapen hori hitzarmen bidez formalizatzea erabaki dute eta horrez gain Ibaiondoko eraikinak zituen gabezia batzuk ere konpondu dira; konponketa horien aurrekontua 8.525 eurokoa izan da.
Aspace Bergarako dinamiketan txertatzeko nahia
Garun paralisia duten haur eta gaztetxoak hartzen dituen eskola da Ibaiondon kokatuta dagoen Aspaceren hau. Eskola arruntean aritzeko zailtasunak dituzten ikasleak hartzen ditu. Hainbat esparru lantzen dira bertan, hala nola komunikazioa, motrizitatea, autonomia... ikasle bakoitzaren hezkuntza-beharretara egokituta, eta garapen pertsonal egokia ahalbidetzen zaie.
Aspaceko ikastetxeetako arduradun Kepa Goikoetxearen arabera gainontzeko ikastetxeei ematen zaien tratamendu berbera ematea da helburua, herriaren dinamikan txertatuz.
Gorka Artola alkateak balioan jarri du Aspacek egiten duen lana: "Urte asko dira lan hau egiten ari dela, beharrezkoa lana gizarte osoarentzat. Bergara herri inklusiboa izan dadin nahi du Udalak eta garrantzitsua da pertsona guztiek –dituzten ezaugarri, jatorri, ideia...– duintasunez bizitzeko aukerak izatea".
Herritarrei ezagutzera eman nahi zaie ikastetxe honek egiten duen lana. Aspacek bost ikastetxe ditu Gipuzkoan, horietako bat da Ibaiondo kalekoa. Une honetan sei ikasle dauzka, baina gehiago ere izan ditu.