"Lehergailuak egiteko materiala edukitzea" leporatuta launa urteko espetxe zigorra ezarri die Espainiako Auzitegi Nazionalak Aitor Zelaia eta Galder Barbado gazte arabarrei. Ernai gazte antolakundetik "gogor" gaitzetsi dute Auzitegi Nazionalaren epaia, eta gazteak "askatzea" aldarrikatu dute: "Argi diogu ez dugula onartzen epaiketa bera".
San Martin plazatik abiatu den manifestazioak herritar ugari batu ditu gaur iluntzean, Espainiar estatuak "berriro ere bere makinaria errepresibo guztia martxan jarri duela" salatuz, "bere izaera inposatzaile eta autoritarioa erakutsiz": "Argi daukagu Espainian ez dagoela demokraziarik, eta are gutxiago justizia oinarrian daukan estatua. Hori dela eta, gazteok ez dugu onartzen injustizian oinarritutako epaiketa hau, gazteria zigortzea eta beldurtzea baitu helburu".
"Beste Euskal Herri bat eraikitzeko"
Absoluzioa ez den epairik onartuko ez dutela azaldu dute: "Argi esan nahi dugu ez dela espetxeak betetzen jarraitzeko garaia, espetxeak hustekoak baizik". Belaunaldiz belaunaldi gazteek, "beste Euskal Herri bat eraikitzeko egindako ekarpena" goraipatu eta gogora ekarri nahi izan dute: "gazte belaunaldi honek ere, injustizia guztien gainetik, Euskal Herri feminista, sozialista eta euskalduna lortzeko borrokatzeko hautua hartuta dauka".
Egoeraren aurrean, independentzia "aukera bakarra" dela aldarrikatu dute: "errepresio kasu honek, borrokan jarraitzeko arrazoi bat gehiago bestetik ez digu ematen".
