Taldea "herri bezala jardun eta bultzatu nahi diren balioak adostu, landu eta horiek sustatuko dituzten ekimenak aurrera ateratzeko talde eragilea" dela azaldu dute Bergara Herri Hezitzailerantz-eko sustatzaileek. Asmoei dagokienez, besteak beste, hurrengo hauek izango dira bultzatuko dituztenak: haurtzaroaren kultura onartzea, parte-hartzea eta erabakitzeko ahalmena sustatzea, aisialdi hezitzaile euskalduna parekidea eta anitza indartzea, ingurumen natural eta kulturala zaintzea, komunitate sarea ehuntzea eta auzolanaren ideia azpimarratzea. "Martxan dauden ekimenak balioan jartzea eta ekimen berriak hauspotzea izango da gure erronka", gehitu dute.
Gaiaren inguruko interesak batzen ditu, eta taldea Bergarako beste eragile zein norbanakori irekita dagoela esan dute. Proiektuari buruz gehiago jakiteko edo bestelako zalantzak argitzeko, bergaraherrihezitzailea@gmail.com helbidea ahalbidetu dute.
