Duela urtebete pasa hasi zen Udaletxean lanean Markel Barrocal, udaletxeko arreta zerbitzura gerturatzen diren herritarrak hartu eta zerbitzua ematen: "Herritarrei behar duten informazioa emateaz arduratzen da eta lehen tramiteak egiten laguntzen die. Arreta unea eta gunea humanizatu egin du, bere laguntzeko prestutasun eta jarrera irekiarekin". Udalean lankide dituenek ere "estimu handia" diotela aitortu eta “langile eta lankide bikaina” dela azaldu dute: “hitzekin ezin da eskertu zenbat ematen duen”.
Gureak-en bere perfila eta gaitasunak aztertu ostean, udalean izango zituen eginkizunak zehaztu eta herritarrei harrera egiteaz gain, beste hainbat lan ere egin ditu Barrocalek hilabete hauetan: "pandemiak eragindako etenaren ondoren udaletxera bueltatu denean, prebentzio neurriak kontrolatu eta eraikinean sartzeko jarraitu beharreko irizpideen berri ere ematen die herritarrei eta ordenagailu bidez txanden kontrola ere egiten du".
"Benetako inklusioa lantzea"
Gureak-ek diploma eman dio gaur, "egindako lan ona aitortuz", Gorka Artola alkatea eta bere lankideak ondoan izanda. Alkateak Pauso berriak programa nabarmendu du: "programa honen bitartez, benetako inklusioa lantzen da eta horrela, urrats errealak ematen ditugu pertsonen arteko berdintasunean. Herritarren berdintasuna oinarrizko ardatza da Bergarako udalean. Baina ez hori bakarrik, gazteei lanerako aukera eta ondorioz, formatzen jarraitzeko aukera ematen zaie".
