Jardun euskara elkarteak antolatutako Erdaldun berrien kluba bakarrizketan barrea izan zen nagusi. 100 lagun inguru batu ziren, atzo, zapatua, Seminarixoan, Olatz Pagalday antzezle eskoriatzarrak eskainitako saioaz gozatzera. Segurtasun neurriak bermatuta, pertsonen arteko distantziak ezarrita, eta, bertaratutako guztiek musukoak jarrita, giro bikaina izan zela adierazi du antzezleak.
"Ni oso gustura izan naiz oholtza gainean, eta, Seminarixora gerturatu direnek ere disfrutatu dutela esango nuke. Umoreak ez du sekula hutsik egiten", adierazi du Olatz Pagalday aktore eskoriatzarrak.
Antzezlanaz gozatzeko Seminarioan batu zirenak.
2014an estreinatutako Erdaldun berrien kluba antzezlana, Olatz Pagalday aktore eskoriatzarrak antzezten du. Gidoia, berriz, Idoia Etxeberriak idatzi zuen, eta, ordutik hainbat saio egin dituzte Euskal Herri osoan zehar. Erdaldun berri batek egin beharreko terapiarekin barre egin eta hausnartzeko antzezlan aproposa da eskaintzen dutena, eta 45 minututako saioak ez du sekula hutsik egiten.
