Miguel Altuna-ko ordezkariak eta FEX elkartean dauden enpresetako ordezkariak izan dira sinadura ekitaldian, eta "positiboki" baloratu dute alde biek gaur abiatu duten hitzarmena. "Guretako enpresekin elkarlanean jardutea beti izan da ardatz garrantzitsua. Gaurkoarekin FEX elkarteak gure baliabideak eta espazioa erabiltzeko aukera izango du, eta guk, euren ezagupenak eta bestelako baliabideak ere jasoko ditugu. Kontuan hartzekoa da, Bergaran lanpostu gehien sortzen duten hainbat enpresek sortu duten elkartea dela FEX", azaldu du Miguel Altuna Lanbide Heziketako zuzendari Joxu Aranak.
Eta zera gaineratu du FEX elkarteko lehendakari Aitor Sotesek: "Hitzarmen honen bitartez guk etxe bat dugu Miguel Altunan, eta ez hori bakarrik aukera ikusten dugu bertan egiten dituzten ekintzak ere gure proiektuetarako lagungarriak izateko; gure proiektuetan eurekin elkarlana sustatuko dugu. FEX, Bergaran sortutako elkarte berri bat da, torlojugintzan eta balio kate osoan ari diren enpresen artean sortutakoa. Momentuz hamasei enpresa ditugu elkartean, asko Bergarakoak, baina baditugu Berrizekoak, Elgoibarkoak, edota Huarte Arakilekoak ere".
