Bergarako Matxiategi kaleko bizilagun batek GOIENAri aditzera eman dioenez, arazo bat dute auzoan katuekin: "Denbora asko daroagu katuekin baina egoera nazkagarria izatera pasa da. Bizilagun batzuk atarietatik edo balkoietatik jaten ematen diete katuei, eta katuak erabat ohitu dira gure artean bizitzera. Ez dira apartatzen euren ondotik pasatzean, usain oso txarra dute eta ingurua nazkagarri dago; jaten ematen dieten bizilagunei eta Udalari egoera aldatzeko eskatu nahi diet".
"Arazo larria" Artzamendin
Artzamendin larriagoa da egoera, bizilagun baten arabera: "Artzamendi kalean katuen arazoa aspalditik dugu, arazo larria. Udaletxean idatziak sartu izan ditugu baina ezer. Katuak terrazetara sartzen dira... gero eta gehiago dira, dagoeneko 18 katutik gora eta bizilagunek jaten ematen jarraitzen dute, nahiz eta ezin den. Honek beste arazo bat ekarri du, dagoeneko arratoiak daude auzoan; alboko portalean hiru aldiz sartu dira arratoiak aurten eta tinbreetako kableak jatera heldu dira".