Debagoienako eta Debabarrenako hainbat gazte batu dira gaur arratsaldean Bergarako Kartzela Zaharrean, Gazte Koordinadora Sozialistak antolatu duen egitarauaren harira. Hitzaldiek eta elkar ezagutzeko dinamikek osatzen dute jardunaldi hauen muina, helburua "testuinguruaren eta koiunturaren inguruko analisi eta hausnarketa politikoa egitea" delarik. "Komunitate politikoa sendotzeko nahia" ere badaukate jardunaldiek, horregatik prestatu dute aisialdirako eskaintza.
Gazte Koordinadora Sozialistaren iritziz, "egoera oso eskasa bizi du egungo langile klaseak". Arrazoi honegatik jotzen dute "ezinbestekotzat" langileria batu eta antolatzea.
Gaur arratsaldean inauguratu dituzte jardunaldiak, "okupazioaren aurkako kanpaina" izeneko hitzaldiarekin. Besteak beste, hedabideek okupazioaren inguruan jaurtitzen dituzten mezuak izan dituzte hizpide, eta nabarmendu dute okupazioa tresna garrantzitsua izango dela etorkizunean langile klasearentzat. Horren ostean parrillada musikatua egin dute Gaztetxeko patioan. DJek girotu dute otordua eta militante berriek elkar ezagutzeko parada eduki dute bertan.
Datorren zapatuan, hilak 17, berrekingo diete gazte sozialistek berriz ere jardunaldiei. Hiru orduko mendi martxa egingo dute Bergarako plazatik Asentziora, goizeko 9:00etan hasita. 14:00etan bazkaria egingo dute Kartzela Zaharrean, eta 17:00etan gaur egungo faxismoari buruzko hitzaldia burutuko dute. Azken urteetan Europan eskuin muturreko mugimenduek izan dute gorakadaren aurrean GKS-ko militanteek argi dute euren iritzia plazaratu eta aurre egiteko planteamendu propioa zabaldu beharra dagoela.
Gazte Koordinadora Sozialistatik gonbidapena luzatu dute datorren zapatuko egitarauan parte hartu nahi duen gazte oro Bergarara hurbil dadin.
