Ikastaroak doan izango dira, emakumeei zuzenduta eta matrikulatzeko epea ikastaroa hasi baino 5 egun lehenago bukatuko da. Ikastaroen hizkuntza erabaki gabe dago oraindik, izena emandakoen arabera zehaztuko baita. Informazioa eskatzeko edo izena emateko bi bide daude: 943 779100 telefono zenbakira deituz edo berdintasuna@bergara.eus e-postara idatziz.
Autoestimu Feminista
Irailaren 21 eta 28an eta urriak 5ean egingo da, Irizar jauregian. 18:00etatik 21:00etara izango da ikastaroa, Emagin elkartearen eskutik. Emakumeek jarrera feminista izateko hautua hartzean izan dezaketen oztopo eta hausnarketak landuko dituzte taldean.
Nire Barneko Haurra Besarkatzen
Urriaren 17 eta 18an egingo da Agorrosinen, 09:00etatik 14:00etara bitartean, Elena Urigoitiak gidatuta. Txikitatik bizi izandako esperientziek zeresana izan dezakete eta iraganeko memoria horrek orainaldian eragin dezakete. Hori aztertzen eta ulertzen ahaleginduko dira.