Bergarako Sortuk mobilizazioa deitu du gaurko, hilak 7, 19:30ean, Bergarako Plazan. Sortuk azaldu du Estatu Espainiarraren Espetxe Politika dela "heriotzaren erantzule": "Espainiako estatua eta gobernua dira heriotza honen arduradunak, larri gaixorik eta kondenaren 3/4 beteta zuen presoa kartzelan beraien legalitatearen kontra preso mantendu dutelako".
2005eko martxoan atxilotu zuten Gonzalez Sola, eta 20 urteko kondena ezarri zioten, ETAri laguntzea, armak gordetzea eta dokumentuak faltsutzea egotzita. Inkomunikatuta eduki zuten eta torturak salatu zituen bilbotarrak. 2008an eta 2009an, Puertoko kartzelan eta gero Badajozkoan, bere buruaz beste egiten saiatu zen.
Bergarako Sortuk, bestetik, adierazi du "aski da esateko ordua" dela: "Ez dugu egoera hau inondik inora onartzen. Preso, iheslari eta deportatu politikoen askatasuna exijitzen dugu, konponbide prozesu guztietan ohikoa den bezala".