Atzo, abuztuak 27, jokatu zen finala Bilboko Bizkaia pilotalekuan.
Azkoitiaren taldeak (urdina) Mikel Inuntziagarena (gorria) izan zuen aurrez aurre; hirukote horretan zegoen hain zuzen beste bergarar bat Arrate Bergara, Iera Agirrerekin (Leitza) eta Amaia Aldairekin (Dima) batera.
Finala buruz buruko lehen norgehiagokarekin hasi zen, entrenatzaileen arabera txapelen norabidea erabaki zezakeen partidarekin, hain zuzen ere. Amaia Aldai eta Olatz Arrizabalaga izan ziren aurrez aurre, eta Arrizabalaga izan zen nagusi kantxan (5-12).
Arrate Bergarak, bere partidua irabazi
Bigarren partiduan Iera Agirre eta Arrate Bergara bikote gorriak, Irantzu Etxebeste eta Nora Mendizabal urdina izan zuen aurrez aurre. Agirre aurrelari leitzarrak ez zien aukerarik eman aurkari gazteei (12-3). Gorriek irabazi zuten partidu bakarra izan zen.
Kontuak hala, azken neurketan erabaki zen finala, bigarren buruz burukoan. Agirrek eta Arrizabalagak jardun zuten nor baino nor gehiago kantxan, eta azken horrek aise irabazi zuen partidua (1-12).
Bizkaia pilotalekuan 400 zale baino gehiago elkartu ziren finala bertatik bertara jarraitzeko eta ateak itxi behar izan zituzten jende gehiago ez sartzeko, segurtasun neurriengatik.
