COVID19ak eragindako osasun-larrialdiko egoeraren ondorioz, erregelamenduan eta programan zenbait moldaketa egin ditu kirol sailak. "2020-2021 ikasturterako proposamena egin ahal izateko moldaketak dira, bestela ezin zirelako bermatu higiene eta segurtasun neurriak; besteak beste, momentuz, ez ditugu eskainiko haurren igeriketa eta Xfit. Hala ere, aurrerago ikastaro berriak eskaintzeko aukera badago, egingo dugu saiakera, pandemiaren bilakaeraren arabera".
Bestalde, bi aukera berri eskainiko dira: multitraining kalean, hau da, kalean, indarra, erresistentzia, abiadura etab. entrenatzea; bestetik entrenamendu gidatuak, non erabiltzaileak monitore bat kontratatzen duen sesio baterako. Zerbitzu hori pertsona batentzat edo gehienez 7 laguneko talde batentzat izan daiteke (jardueraren arabera).