Abuztuan ere zuzeneko musika proposamenak

Bergarako Lemak taldeak abuztuaren 6an Usondo parkean eskainiko du kontzertua. Argazkia: Iagoba Domingo.

Jazza, pop-rocka eta beste estilo askotako doinuak eskainiko dituzte Bergarako txoko ezberdinetan herriko eta kanpoko musikariek, gazteentzako eta helduentzako; guztiak doan dira, baina orain arteko emanaldietan moduan, edukiera mugatua izango dute.

Berumuga musika zikloa izan da uztailean musika eskaintza nagusia, blues, rock-and-roll eta bestelako doinu dantzagarriei tokia eginda; abuztura begira askotariko musika estiloak zuzenean entzuteko aukera izango da, Kultura Mahaiak –Udala herriko elkarteekin elkarlanean– osatutako eskaintzan.

Kontzertu guztiak aire librean dira, herriko txoko ezberdinak agertoki bihurtuta. Emanaldi guztiak doan dira, baina edukiera mugatua dute; ez dago aurre-salmentarik.

Bluelongue taldeak Osintxuko plazan egingo du kontzertua abuztuaren 5ean. Argazkia: Bergarako Udala.

Jazza, Osintxuko plazan

Bluelounge Quartet taldeak jazz doinuekin zipriztinduko du abuztuaren 5eko iluntzean Osintxuko plaza. Ibilbide handiko Kataluniako musikariak izango dira agertokian, eta, jatorri askotariko jazz doinuez gainera, Argentinako eta Brasilgo kantu ezagunen moldaketekin osatu-tako dute errepertorioa.

Azkoitiako Bulego taldea abuztuaren 6an izango da Usondo parkean. Argazkia: Bergarako Udala.

Bulego, diskoa aurkeztera

Otsailean Hegan kanta argitaratu zuten, eta lehenengo kontzertua eman eta itxialdia etorri zen segidan. Abestiak ateratzen aritu dira eta sare sozialetan zabaldu dute lehen EPa, irratietan ere hedapen handia duena."Ekainaren 20an kontzertu handi bat egin zuten Azkoitian, eta Bergarakoa izango da bigarrena. Gure helburua proiektu berriei tokia egitea izan da eta oso pozik hartu zuten proposamena", adierazi du Kultura Mahaiko Aritz Alustizak.

Xabi Bandini taldeak Kooltur Ostegunak musika zikloan otsailean eskaini zuen kontzertuaren une bat.

Xabi Bandini hirukotea

Iaz urte bukaeran argitaratu zuten Biba! lan Kerobia taldean ibilitako Xabi Bandinik eta Alberto Isabak Lur Larrazarekin batera. Aurkezpen-kontzertu askorik ez dute egin, eta jotzeko "gogotsu" datozela dio Alustizak: "Jotzeko irrikaz daude, eta kontzertu indartsuak dituzte".

Energiaz beteriko elektro-pop zuzena egiten dute; sintetizadoreaz, teklatuaz, bateriaz eta gitarraz lagunduta.

Iker Lauroba Beste Urtaroak taldearekin izango da Osintxuko plazan, abuztuaren 30ean. Argazkia: Iker Lauroba.

Iker Lauroba eta Beste Urtaroak

Leire Leturekin, Olaia Inziarterekin, Urbil Artolarekin eta Llilena Susselekin osatu zuen Iker Laurobak Beste Urtaroak taldea. Laurobak grabatutako diskoetako kantuen folk bertsioak egiten dituzte, beste herrialde batzuetako musika tresnak gure kulturara hurbilduta.

Bergarako Indai hirukote berriak kontzertua egingo du abuztuaren 27an Usondo parkean.

Herriko Lemak eta Indai

Konfinamenduari etekina atera dio Lemak taldeak, hasieran kontrakoa zirudien arren. "Martxoan ginen entseguekin gogor hastekoak, baina ezin, eta sare sozialetan hasi ginen kantuak zabaltzen eta berriak sortzen. Estiloa definitu gabe, rock punkeroetatik, doinu lasaiagoak ere badituzte kantuek. Jaietako streaming kontzertuan oso gustura hartu genuen parte".

Nerea Aginagalde, Yune Nogueiras eta Leire Moñux lagunak itxialdian hasi ziren bertsioak egiten. Eurek ere "pozik" hartu zuten parte streaming-ekoan, baina aurrez aurrekorako zuzenekoan "sorpresak izango direla" iragarri dute.

 

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.