Bergara Kirol Elkarteko hamabost bazkide elkartu ziren atzo egindako urteko batzar orokorrean. Urteko kirol laburpena egin zuten eta diru kontuak ere izan zituzten hizpide, bukatuta dagoen denboraldiarenak eta datorrenak izango duen aurrekontua onartu zituzten, esaterako.
Datorren urtera begira zalantza asko daudela adierazi du Josu Elorzak, BKE-ko presidenteak, eta gaineratu du birusak markatuko duela denboraldi berria: "Ez dakigu noiz hasiko garen, aldagelarik izango dugun, ikusleak izango diren... kantina ireki ahalko dugun ere ez dago jakiterik. Sail guztiek egoerak baldintzatutako aurrekontuak prestatu dituzte, kontinuistak, gastu kontrol handiarekin".
Kuotei dagokionez, datorren denboraldiko kuotetan %20ko deskontua egitea erabaki zuten, COVID-19 birusaren eraginez. Deskontu hori talde federatuetan, futbol eskolan eta bazkideetan egingo zaie. Baita enpresa eta kolaboratzaileei ere, babesletza eta laguntzetan.