Antolakuntzatik azaldu dutenez, uste baino bikote gehiagok eman dute izena aurtengoan bikotekako frontenis txapelketan: "Hogei eta hogeita hamar bikote inguru espero genituen eta guztira 61 bikotek eman dute izena, hasieran espero genuen baino dexente gehiago dira". Herritarren artean txapelketak harrera "ona" izan duela adierazi dute eta jendea jokatzeko "gogotsu" dagoela adierazi dute.
Bikote mixtoak ere
Neskei dagokienez, 11 bikote animatu dira txapelketan parte hartzera eta 48 mutilen kasuan. Bikote mixtoen kasuan bi bikotek eman dute izena. Atzo hasi ziren lehen partidak jokatzen, bost guztira, eta antolakuntzatik zehaztu dutenez, egunero bost eta hamar partidu inguru jokatzeko asmoa dute.
Lau pilotalekutan
Bergarako pilota sailaren eta Udaletxearen laguntzarekin antolatu dute bikotekako frontenis txapelketa. Segurtasun neurriekin, herriko lau frontoitan jokatuko dituzte partidak; Boluko pilotalekuan, Udal pilotalekuan, Angiozarren eta Osintxun.