2015ean Euskal Literaturaren Antologia 1: Erdi Arotik Errenazimentura argitaratu zuen Euskaltzaindiak, eta orain, bigarren antologia aurkeztu berri du: 2. Errenazimentutik Ilustraziora. Ia 700 orrialdeko liburuan, antzerkien atalean, Xabier M. Muniberen lana ageri da: Mozkorra parregarri, historiako lehen euskal opera.
"Bergarako Mozkorra parregarri opera-taldeari duela bost urte estreinatu genuen ikuskizuneko argazki-bilduma eskatu ziguten", azaldu du Valen Moñux taldeko zuzendariak, eta liburuan argazki horiek erakutsi dituztela gehitu du. Horrela, Euskaltzaindiak argitaratu duen liburuko orrialde oso bat hartzen du obrak: "Argazki horiek Euskaltzaindiaren Ilustrazioari buruzko argitalpen batean agertzeak Euskal Herriko literaturaren historian ofizialki sartu gaitu".