COVID-19 gaitzak eragindako konfinamendu egoera aurretik egin ohi zuten bezala, ostiralero plazara bueltatzeko asmoa agertu du Gure Artera-Sarek, Etxerat Euskal preso eta iheslari politikoen senide eta lagunen elkartearekin batera: "ostiraleko erreferentzia gune den plazako hitzordua berreskuratzera goaz. Presoak berriro plazara, bi hilabete eta gero".
Hala, ostiral honetan, hilak 15, ekitaldi "txukuna" egin gura dute 20:30ean eta horretarako herritarrak parte hartzera animatu dituzte: "Leiho, balkoi eta mobilizazio telematikoak agurtzen joan eta egoera, pixkanaka eta modu mailakatuan, aldatzen joan behar gara, kaleak berreskuratuz eta mobilizazioekin hasiz".
Babes neurriekin
Jakinarazi dutenez, baimenak eskatu eta onartu ostean, krisi egoerak eskatzen dituen babes neurri guztiak hartuko dituzte, eta batez ere distantzia mantenduko dela azpimarratu dute, plaza dena hartuz. Preso guztien eskubideak aldarrikatzearekin batera, bergarar bikote eta senitartekoak dituzten sei presoren egoera plazaratuko dute bereziki: Lexuri, Josu, Alicia, Aitzol, Oskarbi eta Xabin.
