Ibargarai kalean egin beharreko lanak esleituta eta konprometituta zeuden alarma egoera ezarri aurretik; maiatza amaieran hastekoak ziren, baina egoera zein den ikusita datorren astean hastea erabaki dute. Hain zuzen, Ibargarai kaleko 4 zenbakia eta 14 zenbakien artean izango dira lanak. "Alarma egoerak irauten duen bitartean kalean egongo diren mugimenduak txikiagoak" izango direla iritzita hartu dute erabakia.
Merkatariek ondo ikusi dute obrak ahalik eta azkarren egitea
Udalak Ibargaraiko dendariekin aukera ezberdinak aztertu ostean, horiek begi onez ikusi dute obra ahalik eta azkarren egitea. "Izan ere, dendak itxita dauden bitartean obrak ahalik eta gehien aurreratzeko saiakera egingo da, dendak irekitzeko aukera noiz egongo den jakin ezin bada ere", diote Udal ordezkariek. Bizilagunen ordezkariekin ere izan da kontaktuan Udala.
Seminarioko patioa
"Inguruko aparkalekuak hustea komeni denez eta mugimenduak mugatze asmoz, Seminarioko patioko zati bat egokituko da aparkaleku bezala, alarma egoerak dirauen bitartean", azaldu dute.
Egingo dituzten lanak
Ibargarai kaleko 4 eta 14 zenbakien arteko eremuan ur, euri-ur eta argiteriako azpiegiturak berriztuko dituzte, eta errepide zatia eta espaloia berrurbanizatuko dute. Aurreikuspenen arabera sei hilabete iraungo dute lanek.
Lanak Const. Artzamendi SA enpresari esleitu zaizkio 308.848,70 euroren truke –BEZ barne–; obraren zuzendaritza BEB Arkitektoak SLP enpresak hartu du –8.228 eurotan–; eta, lanen exekuzio materialaren zuzendaritza Iñaki Arregi Garitanok –8.228 euro–.