Udaleko beste departamenduetan bezala, joan den astetik osasun-segurtasunerako neurri berriak ezarri ziren, eta gomendio berrien arabera egokitzen doaz uneoro.
Garbiketa "sakona", egunero
Martxoaren 16an hasi ziren Udaleko langileak egunero errepide, espaloi eta hiri-altzariak garbitzen eta desinfektatzen. Horretara, ohiko kale garbitzaileez gain, brigadetako beste kide batzuk ere bideratu zituzten. Gainera, garbiketa-kamioiarekin errepideak eta espaloi bazterrak baldeatu eta eremu horietatik mangera pasatzen dute. Horrekin batera, udalerriko hiri-altzariak ere egunero garbitzen dihardute: barandak, edukiontziak, semaforoen sakagailu edo pultsadoreak, iturrietako pultsadoreak, aulkiak, auzoetako buzoiak, autobus markesinak, Boluko igogailuak kanpotik eta barrutik...
Eta aste honetan bertan, ura eta sodio hipokloritoa %0,1eko kontzentrazioarekin uretan disolbatuta, espaloiak eta zabalik dauden negozio eta zerbitzuen (farmazia, denda, anbulatorio, supermerkatu, edukiontzi, igogailu...) inguruak desinfektatzen hasi dira. Guztira 12-14 pertsona ari dira garbiketa eta desinfektatze lan horiek egiten, herritarren artean Covid-19 birusaren hedapena saihesteko asmotan.