Miguel Altuna Lanbide Heziketaren egoitza berria "herrigunearekin lotzeko" asmoz, 850 metroko pasabidea eraikitzeko lanak "txukun eta arazo handirik gabe" doaz, Udaleko Hirigintza Sailaren arabera. LKS da obren zuzendaria eta urrian eta azaroan izandako "eguraldi txarrak" eraginda Morga SA enpresari "luzapen txiki bat" onartu zion.
Udaleko Hirigintza Sailak aurreikusten du obrak martxoaren 18rako bukatuta egotea: "Inongo okerrik ez badago barandaren hornitzaileekin eta aglomeratua zabaltzeko eguraldiak laguntzen badigu, lanak martxoaren 18an bukatuta egon beharko lirateke. Hori hala izanda, martxoaren 23rako, astelehena, oinezkoentzat erabilgarri egongo litzateke". 850 metro luze eta 2,5 metroko zabalera duen pasabideaz gain, beste "gehikuntza batzuk" ere izan ditu proiektuak; hasierako aurrekontua 235.890 euro izan da.